幸福學. 學幸福 

衰仔紙對香港安老嘅貢獻：用真金白銀鼓勵你唔養父母。

 

假如你仍然未知道，你就要行快幾步。香港政府比任何地方政府都好得多

。響新加坡，你唔供養父母可能會被打藤。響大陸，唔養父母可能會犯官非。

只係響香港，你只要簽張衰仔紙，政府就會接晒個波，負責養你父母過世，食

住全包。

 

有無咁着數？裏面肯定有機關!

 

機關就無,不過食得鹹魚抵得渴，簽咗張衰仔紙，你就要狠起條心，最好就

斗零都唔好再畀老豆老母。你畀都可以，但係一定要向綜援報告，佢哋就可能

從畀你父母嘅綜援扣返你俾父母嘅零用錢。 嘩！咁即係白畀！無錯，嘥晒！ 當

然咁辛苦的動作好可能會感動到你父母嘅！講到狠起條心，最好就少啲去探父

母。你知啦，我哋仲有良心嘅。睇倒父母住大笪地，毫無私隱。又要剝光豬等

沖涼，每日都傻咗咁坐喺度， 你到時都唔知道點安慰佢？

 

其實政府用心良苦，假如對老友記太好，容乜易佢哋唔捨得走，政府財政

開支增加邊個埋單先？依家咁嘅安排，仔女的負擔輕咗，政府畀食畀住，老友

記都會感恩。出咗事，引起公憤，自然就係賺到盡嘅老闆出嚟孭啦！哦！我依

家至明白點解政府唔肯改變用綜援去養老的政策。連表面上唯一嘅輸家，我哋

嘅老友記，實際上都係贏家。早啲去天堂梗係好過響度獻世！